Цените на туристичките услуги во Црна Гора се задржани на ланско ниво, вели претседателката на Националната туристичка организација на Црна Гора, Лилјана Цукиќ.
„Цените се за туристи со различна платежна моќ и е прилагодена за сите туристи. Има различни понуди прилагодени за сечиј џеб, од приватно сместување, апартмани до најлуксузни хотели.
Црна Гора беше прва од државите кои ги укина ковид-сертификатите уште во март, па се надеваме дека туристите ќе уживаат во понудата, чиј што квалитет годинава е подобрен. Квалитетот на понудата на сместувачките капацитети е на повисоко ниво,“ изјави Цукиќ на промоцијата на Црна Гора како туристичка дестинација во Скопје.
Цените во приватно сместување се движат од 7 до 15 евра по човек, и од 30 до 60 евра за апартман во зависност од категоријата.
„Има зголемен број на категоризирани приватни сместувачки објекти, и тоа влијае во формирањето на цената. Многу е важно, гостите да се чувствуваат пријатно како во хотел,“ вели Цукиќ.
Весна Поповиќ од групацијата на хотели „Монтенегро старс“, во која е и еден од најлуксузните хотели во Црна Гора, „Сплендид“, вели дека во нашиот регион се уште нема навика за ран букинг, кој е ценовно поволен.
„Ние од 1 октомври, пуштаме резервации за ран букинг кој е и до 30 проценти поевтин за сезона. Од 1 мај, веќе нема ран букинг. Сплендид работи 365 дена и имаме гости од Македонија кои редовно ни доаѓаат,“ вели Поповиќ која ја потенцираше добрата соработка со македонските туристички агенции.
Традиционално, Црна Гора ја посетуваат до 40.000 македонски туристи, бројка која црногорските туристички работници, сакаат да се зголеми.
Годинава, освен на гостите од регионот, црногорските туристички работници акцент ставаат и на туристи од трети земји, како Саудиска Арабија, Казахстан, Израел, Турција.
Црногорците се надеваат и на туристи од Европа, има зголемен број на летови од Франција и Германија, а го очекуваат и враќањето на чешките туристи.
ПОВРЗАНИ ВЕСТИ
Фото: Unsplash