Дефицит на крв од крвна група нулта позитив има на локално и државно ниво. Од Црвениот крст во Кавадарци апелираат да се дарува крв.
– Дарувајте крв и спасете животи. Ги известуваме сите крводарители од Кавадарци и Росоман со крвна група нулта позитив дека поради дефицит со оваа крвна група на локално и на државно ниво, доколку се чувствуваат здраво и можат да даруваат крв, да го сторат тоа в четврток во кабинетот за трансфузиологија во Кавадарци после 8 часот, изјави претседателот на Црвениот крст во Кавадарци, Диме Каракулев.
Тој најави уште една крводарителска акција на 29 септември во Домот на културата „Иван Мазов – Климе” во Кавадарци, што ќе трае од 9 до 14 часот.
Притоа потсети дека кавадарчани и росоманци се меѓу најхуманите во државата кога станува збор за доброволни крводарувања, а Општинската организација на Црвениот крст во Кавадарци секогаш го натфрлува годишниот план.
МИА