Проф. д-р Драган Даниловски во разговор за Плусинфо вели дека врвот на четвртиот бран го поминавме на 25 август и оттогаш бројките беа во постојан пад, сѐ до 15 септември.
Очигледно е дека наставата во живо во училиштата не влијаеше на нарушување на епидемиолошката рамнотежа, освен што бројките продолжија да паѓаат, но со позабавено темпо – сѐ до 12 октомври, кога конечно ефективниот репродукциски број стана повисок од единица. А тоа значеше почеток на експоненцијален раст, смета тој.
– Тоа подразбира дека наредните денови ќе бидеме сведоци на сѐ поголемо забрзување на растот на бројките. Ќе имаме раст на заразените, но не верувам дека болниците ќе се преполнуваат.
Причините дефинитивно се „згуснатите“ социјални контакти во текот на предизборните активности, но и веселбите, дружбите во затворено, заради постуденото време.
Во моментов сме сведоци дека мерки практично нема – дури и се релаксирани (!?) – а бројките експоненцијално растат. И ќе растат цела зима, сѐ додека не се воспостави епидемиолошка рамнотежа на т.н. повисоко ниво. За потоа, експоненцијалниот раст да стивне.
И од пролет да го имаме вирусот во ендемична форма на постоење. И така сите наредни години би имале сезони на настинки, грип и – ковид! Со тоа што на ковидот ќе му бидат истапени забите… – проценува Даниловски.
Загрижувачки, како што вели професорот, независно од неповолниот развој на епидемиолошката ситуација, дека секому е јасно дека кај нас короната како да е избришана од свеста на населението.
– Не само кај обичните луѓе – особено младите и оние „заколнатите“ негатори на постоењето на вирусот… туку и кај сите политички партии! Јас не видов ни „м“ од мерка во тек на предизборните митинзи, особено не во тек на прославите после првиот круг. Јас не видов во разговори по телевизиите некој да носи маска…, вели Даниловски.
ПОВРЗАНИ ВЕСТИ
Доктор Даниловски: Короната дојде за да остане – со помалку или повеќе крв и солзи, сеедно
Фото: МЗ