Д-р Добринка Наунова Јовановска и главната сестра Габриела Темелковска од Инфективната клиника први ја примија вакцината против Ковид-19, информира на својот Фејсбук профил министерот за здравство, Венко Филипче.
“Со нив, го почнавме процесот на имунизација во земјава. Тие се медицински лица со значајно искуство и огромен придонес во борбата против вирусот.
Им се заблагодарувам за пожртвуваноста во целиот изминат период грижејќи се неуморно за нашите пациенти, деца, роднини и пријатели.
Во знак на почит, вакцинацијата ја почнуваме токму со здравствените работници од ковид центрите. Ги заштитуваме затоа што се во првите борбени линии и ни се потребни во работата!
Д-р Добринка и главната сестра Габриела се чувствуваат добро и упатија порака дека ова е единствениот начин за да ставиме крај на пандемијата„, напиша Филипче.
„Јас ја примив вакцината, се чувствувам одлично. Самото аплицирање на вакцината е безболно и можам да препорачам секој од нас кој е во оваа држава да прими вакцина, по сопствен избор нормално, кој сака „Фајзер“, кој сака некој друг тип вакцина.
Тоа е единствен начин да се заштитиме од овој тип на инфекција што се случува последнава година, со која цел свет се бори, па и ние. Втората доза се прима на 21-виот ден, и тоа е закажан термин кога треба да ја примам втората доза.
Имунитетот се стекнува веќе за две до три недели, се постигнуваат заштитни антитела. Тоа е индивидуално, би требало да се постигне тој имунитет. Ќе се чувствувам посигурна, во однос на тоа ако случајно дојдам во контакт со некој кој е инфициран, мислам дека многу полесно ќе се справам со таа инфекција„, изјави Наунова Јовановска.
За мене, посочи таа, ќе биде една голема сигурност тоа што сум примила вакцина и веројатно ќе бидам заштитена многу повеќе од оние што не примиле вакцина.
„Индивидуално е кој колку ќе развие антитела, и со каков тип на имунитет ќе одговори, меѓутоа воглавно 95 отсто е заштитната моќ на оваа вакцина и јас се надевам дека ќе бидам во тие 95 отсто заштитени, и тоа е она што дава некоја сигурност за понатаму„, Наунова Јовановска.
И Темелковска изјави дека се чувствува одлично.
„Ги поканувам сите да се пријават да се вакцинираат. Секако дека се чувствуваме посигурни, со вакцинацијата ќе се намали и бројот на новозаболени и ќе почнеме да се враќаме во нормален живот„, рече Темелковска.
ПОВРЗАНИ ВЕСТИ
(ВИДЕО) Почна вакцинацијата против Ковид-19 на првите здравствени работници
Фото: МЗ