Бруто надворешниот долг на Македонија изнесува 8,4 милијарди евра на крајот на вториот квартал од 2018 година и во споредба со претходниот квартал се зголеми за 164 милиони евра, соопшти Народната банка.
Кварталниот раст во поголем дел е резултат на зголемувањето на приватниот долг (140 милиони евра), при помал раст и на јавниот долг (25 милиони евра).
Притоа, растот на приватниот надворешен долг главно произлегува од зголемените обврски на капитално поврзаните субјекти (за 93 милиони евра) и небанкарскиот приватен сектор (за 45 милиони евра), додека растот на јавниот долг главно се должи на јавните претпријатија и јавните банки (за 28 милиони евра), при намалени обврски на секторот „држава” (за 6 милиони евра).
Во однос на крајот на 2017 година, бруто надворешниот долг на крајот на јуни 2018 година е повисок за околу милијарда евра. Притоа, во првата половина од 2018 година, долгот врз основа на специфичните активности за управување со девизните резерви на централната банка е зголемен за 293 милиони евра.
Доколку се исклучи нивниот ефект, бруто надворешниот долг од почетокот на годината е зголемен за 768 милиони евра, во услови на раст и на приватниот и на јавниот бруто надворешен долг (за 444 и 323 милиони евра, соодветно).
Растот на приватниот долг во првата половина од годината се објаснува со зголемените обврски на капитално поврзаните субјекти (за 293 милиони евра) и небанкарскиот приватен сектор (за 149 милиони евра), додека растот на јавниот долг произлегува од зголемените обврски на секторот „држава” (за 309 милиони евра).