Премиерот Зоран Заев и министерот за правда Бојан Маричиќ денеска изјавија дека Зоран Милески – Кичеец, кој е осуден на казна затвор и учествуваше во сообраќајна несреќа, излегол од затворот со медицинска документација.
Како што најави Маричиќ, Управата за санкции денеска до медиумите ќе испрати официјално соопштение во врска со затворското отсуство на Милески.
-Нормално, разговарав со директорот за санкции, Маријан Спасовски и ми ги кажа сите детали и верувам дека и тие ќе објават детали коишто се соопштени, се официјални. Секој издржувач на казна затвор после издржувањето на казната има соодветни права.
Овде се работи за комплетирана медицинска документација од здравствени причини која му следува секако на секое лице кое што издржува казни за да може да ги користи посебно со овие аргументации коишто се со соодветни потписи на соодветни лекари, рече Заев.
Не знае, додаде, зошто Милески патувал кон Скопје и зошто со тие луѓе.
-Треба да прашате, затоа што ако е здравствена документација може да се оди до болница, може се оди во главниот град со какви било причини, но дефинитивно тоа е согласно закон, тоа е право кое што му следува на секој издржувач на казна, рече Заев.
Министерот за правда Маричиќ рече дека исто така како и премиерот разговарал со директорот на Управата за санкции и побарал да состават официјална информација која што ќе ја достават до медиумите.
-Она што ми го кажа директорот на Управата е дека тоа што го објавиле во име на Управата со соопштение е точната верзија. Мислам дека се работи за моментална некоординација или разлика во датумите, меѓутоа суштината е дека врз база на медицинска документација добил затвореникот 30-дневен прекин на издржување на казната со цел да ги заврши тие медицински работи и потоа да се врати на издржување, рече Маричиќ.
Кажа дека од Управата за санкции денеска треба да објават повеќе детали, и дека за викендот дадоа првична информација.
-Ние замоливме да направат детална информација во која што ќе ги известат медиумите и ќе ја расчистат оваа дилема што излезе во јавноста.
Меѓутоа, ова не е ниту прв, ниту последен затвореник којшто ги користел овие погодности врз база на оправдана медицинска документација и согласно законот претходно одобрение и на директорот на затворот каде што ја издржува казната и на директорот на Управата за санкции коишто се надлежни и даваат вакви допусти за прекин на издржување на казната, рече министерот за правда.
ПОВРЗАНИ ВЕСТИ
Зоран Милески – Кичеец бил пуштен од затвор поради “неодложни лекарски прегледи“
Зоран Милески – Кичеец меѓу повредените во сообраќајката на патот Гостивар-Кичево
МИА/Фото: МИА