Градоначалникот на Општина Тетово, Биљал Касами преку социјалните мрежи објави дека конечно е целосно изгаснат пожарот во магацините на компанијата „Пофикс“ во поранешниот тутунски комбинат „Македонија Табак“.
Пожарот започна вчера во 9:30 часот, а при крајот на денот се локализираше. Ноќеска и до раните после пладневни часови се уште имаше чад и непријатна миризба од ова место на излезот од Тетово кон Скопје.
–По многу напори на екипата на Територијалната противпожарна единица и доброволци, конечно е изгаснат пожарот во магацинот на фабриката „Пофикс“. Напорите од нашите херои го дадоа долгоочекуваниот резултат.
Ваквите настани посакувам да не се повторат, со надеж дека иднината ќе биде добра и светла. Благодарност до сите учесници кои помогнаа во овие два исклучително тешки дена, порача Касами.
Граѓаните на Тетово се жалат дека во воздухот се уште се чувствува непријатна миризба.
Фото: ЦУК