По завршување на мандатот за кој беа назначени в.д. директорите на ЈП „Водовод и Канализација“, Младински културен центар (МКЦ) и Зоолошката градина, Град Скопје назначи нови директори, информираат од таму.
Од Градот информираат дека за нов директор на ЈП „Водовод и Канализација“ е назначен Драган Илиевски, кој е машински инженер со повеќе од 20 години работно искуство, додека досегашниот директор Марјанчо Митовски, кој на позицијата беше назначен од редот на вработените продолжува со ангажман како секторски директор на претпријатието.
Нов директор на Зоолошката градина е Зоран Попов, кој доаѓа од редот на вработените и е економист исто така со 20 години работно искуство, а во МКЦ ќе биде назначен нов директор по евалуацијата на биографиите за позицијата.
Косана Мазнева е назначена со нов мандат и продолжува да ја извршува функцијата директор на јавното претпријатие Комунална хигиена.