Согласно статистичката анализа на Институтот за јавно здравје, направена заклучно со 5 мај на 1.539 потврдени случаи на Ковид-19, инциденцата на 100.000 жители во земјата изнесува 74.7, информираат од Министерство за здравство.
Највисока кумулативна инциденца е регистрирана во Куманово со 281.7 заболени на 100.000 жители, потоа во Дебар 183.8, во Прилеп 170.0 и Велес 129.8. Инциденца над 50 заболени на 100.000 жители е регистрирана во Скопје, Струга, Штип и Кочани.
Градови кои регистрираат од 0.0 до 0.1 инциденца на 100.000 се Свети Николе, Берово, Ресен, Кратово.
„Највисок број на пријавени случаи на дневно ниво (107) е регистриран на 15 април, 2020 година. Од тогаш, бројот на заболени, односно епидемиската крива бележи пад и соодветно на тоа, од 25 април до 2 мај регистрирани се под 30 нови случаи, а од 2 до 5 мај регистрирани се под 15 нови случаи на Ковид-19,“ се вели во анализата.
Од пријавените случаи 23.2% (357 лица) се или биле хоспитализирани во текот на болеста, а останатите случаи биле или се на домашно лекување и во домашна изолација, асимптоматски или со полесна клиничка слика.
Кај 33.5% (516 лица) од дијагностицираните не се регистрирани симптоми на заболувањето.
Регистрирани се 88 смртни случаи и согласно ова стапката на смртност изнесува 5,7%. Од регистрираните смртни случаи најголем дел се на возраст над 60 години (57 лица). Од починатите кај 75% (66 лица) се регистрирани коморбидитети.
Од 15 февруари до 5 мај, тестирани се вкупно 17.863 материјали во лабораториите во кои се спроведува молекуларно тестирање за присуство на SARS-CoV-2.
Според исходот од заболувањето, 25.6% се активни случаи, 68.7% се водат како оздравени, испишани од болница или се со два негативни теста по домашно лекување.
ПОВРЗАНИ ВЕСТИ
Заболени од коронавирусот во Македонија уште 40 здравствени работници, излекувани 197
Фото: Факултет за ветеринарна медицина