Во Владата се уште незнаат колку македонските граѓани ќе ги чини промената на уставното име.
Од таму не одговорија и на прашањето на еМагазин колку пари до сега се потрошени за спроведување на Договорот од Преспа.
„Меѓуресорската група сѐ уште работи на спроведувањето на задолженија што треба да ги исполнат институциите, а коишто се произлезени од Договорот од Преспа.
Станува збор за работи кои тековно се случуваат, оттука и фискалните импликации не се утврдени во целост„, стои во краткиот одговор на Владата на прашањата на еМагазин испратени на 16 септември, кој го добивме денеска.
Она што и е познато на јавноста до сега е дека се потрошени пари за поставување на табли со новото име на државата на граничните премини, како и табли на државни институции, установи и сл.
На дел од спомениците во Скопје, Битола и Прилеп пак беа поставени натписи, дека истите се однесуваат на хеленската култура, што исто така е предвидено со Договорот од Преспа.
Инаку денеска измина точно една година откако на 30 септември, 2018 година се одржа референдум на државно ниво за прифаќање на Преспанскиот договор со Грција односно промена на името на државата од Македонија во Северна Македонија.
На референдумот од 1.806.336 граѓани запишани во Избирачкиот список, гласаа 666.743 граѓани или 36,91 проценти од вкупниот број граѓани запишани во Избирачкиот список.
На референдумското прашање „Дали сте за членство во ЕУ и НАТО со прифаќање на Договорот помеѓу Република Македонија и Република Грција?“, „за“ гласаa 91,46 проценти или 609.813 граѓани, а „против“ се изјаснија 5,65 проценти или 37.700 граѓани. Неважечки беа 19.221 гласачки ливчиња или 2,89 проценти.
Тогаш, Државната изборна комисија го прогласи референдумот за неуспешен бидејќи не гласале повеќе од половината од вкупниот број граѓани запишани во Избирачкиот список.
ПОВРЗАНИ ВЕСТИ
Една година од референдумот за промена на името: Еден куп афери, а државата се уште на крстопат
Фото: Влада