Од Кабинетот на претседателот Стево Пендаровски потврдија дека тој и вработените во неговиот Кабинет не зеле плата за јануари годинава.
-Образложението кое го добивме од Министерството за финансии е дека во Буџетот за 2023 година нема дополнителни средства за исплата на плати за вработените во Кабинетот на претседателот и го сметаме за неосновано, соопштија денеска од Кабинетот на Пендаровски.
Кабинетот на претседателот во согласност со потпишаниот Колективен договор со Синдикатот на вработените, предвиде покачување од 5 проценти на плата само за државните службеници кои се вработени во Кабинетот на претседателот, велат од таму и посочуваат дека оваа покачување не се однесува за претседателот, именуваните лица и посебните советници во Кабинетот.
-Средствата за Буџетот во 2023 година се обезбедени преку сопствени заштеди во буџетот на нашата институција и за ова не се побарани дополнителни средства од Министерството за финансии, се појаснува во соопштението.
Барањето за финансиски средства за плата за месец јануари 2023 година, кое Кабинетот на претседателот го доставил до Министерството за финансии, се наведува во соопштението, е изработено во согласност со Законот, во рамки на одобрените средства во Буџетот на Македонија за 2023 година, буџетскиот корисник – претседател и во согласност со Колективниот договор за вработените при претседателот.
Фото: Кабинет на претседателот