еМагазин
Image default
ЧИСТА ОКОЛИНА

Поведена постапка против две лица за сечење на трската на крајбрежје во Струга

Основното јавно обвинителство Струга поведе постапка против две лица за сечење на трската од езерското крајбрежје, како и против инспектор по природа од Министерството за животна средина бидејќи одбил да излезе на лице место во моментот кога се сечела трската и да преземе дејствија по барање на јавниот обвинител.

-На 16.03.2019 година двете лица се забележани како уништуваат добро под привремена заштита, односно природна реткост. Имено, еден од осомничените во близина на плажата „Версус“ со кајче влегол во езерото и со срп ја сечел трската. Вториот осомничен го нарачал сечењето на трската со намера да се сопре природниот раст.

Со ваквите дејствија осомничените постапиле спротивно на Законот за заштита на природата, во кој Охридското Езеро е класифицирано како споменик на природата и каде не се дозволени активности со кои се загрозуваат неговите обележја и вредности, се наведува во соопштението од Јавното обвинителство.

Надлежен јавен обвинител од Основното јавно обвинителство Струга против двајцата осомничени започнал постапка заради постоење основано сомнение за сторено кривично дело – Оштетување или уништување на добра под привремена заштита или културно наследство или природни реткости по член 264 од Кривичниот законик.

ОЈО Струга поведе постапка и против инспектор по природа од Министерството за животна средина за сторено кривично дело – Попречување на правдата од член 368-а од Кривичниот законик. Предметот е отворен затоа што осомничениот одбил да излезе на лице место во моментот кога се сечела трската и да преземе дејствија по барање на јавниот обвинител.

Во изминатиот период ОЈО Струга интензивно ја следи ситуацијата со уништувањето на трската на езерското крајбрежје, за што се издадени наредби за засилен надзор. Истовремено, до полициските службеници се издадени насоки за натамошно постапување во насока на откривање на сторителите и на прибавување докази.

ПОВРЗАНИ ВЕСТИ

Твитер „зовре“ за катастрофата во Струга: „Трска гори, Влада се чешла“

Повторно опожарена трска во Струга

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

(ВИДЕО) Шилегов на расправата за аерозагадувањето во Собрание си играше игричка на мобилниот

Редакција

Во ЕУ примената на РДФ е широко прифатена: Видео од фабриката ДЕКО од каде се увезуваше РДФ во Македонија

Редакција

Ќе има ли и парична казна: „Арчелор Митал“ доби 90-дневна забрана за работа поради загадувањето на Вардар

Редакција