Важна констатација и одлука од состанокот е дека Словенија, словенечкото претседателство, го презема португалскиот предлог и продолжува да работи на него со еден силен одек на поддршка од 26 земји членки, којшто е невиден досега во однос на кое било прашање во Европскиот совет, рече министерот за надворешни работи Бујар Османи.
Според Османи, и по најновата блокада од Бугарија на Советот за општи работи во Луксембург на усвојувањето на преговарачката рамка и старт на преговорите на Унијата со Македонија и со Албанија, процесот се уште има кредибилност и преголема енергија.
-Ова не го кажувам за да ги охрабрам граѓаните, меѓутоа јас бев охрабрен во сето тоа разочарување коешто го имавме читајќи ги извештаите на интервенциите на 26-те земји членки. Навистина треба да не држи храбри и оптимисти дека се уште има енергија и кредибилност овој процес и таа енергија е преголема за кој било да ја блокира, рече Османи.
Шефот на дипломатијата повтори дека нема алтернатива за нашето членство во Европската унија.
-Гледајте ја мапата на Европа и ќе видите дека ние таму сме остров. Нема географска и економска логика на која било алтернатива. Тоа е патот, крајната станица, тоа е шина што води кон еден правец. Прашање е на време кога. Јас мислам дека тие не може да не блокираат колку што ние сме упорни во процесот, рече Османи.
ПОВРЗАНИ ВЕСТИ
Почеток на преговорите со Македонија и Албанија останува приоритетно прашање, вели Вархеји
Македонија останува во децениската чекална, извиси и Албанија: ЕУ се надева на преговори што поскоро
МИА/Фото: Влада