Продолжување на билатералните, пријателски и добрососедски односи меѓу Македонија и Република Србија значи денешното отворање на српскиот Конзулат во Охрид, каде за почесен конзул е избран охриѓанецот Михајло Филев.
На свеченоста присуствуваа министерот за надворешни работи на Србија, Никола Селаковиќ, вицепремирката Славица Грковска, министрите за правда Никола Тупанчевски и за култура Бисера Костадиновска Стојчевска, градоначалникот на Општина Охрид, Кирил Пецаков и други гости.
Билатeрaлните односи меѓу двете земји, според шефот на српската дипломатија, се добри во многу сегменти, втемелени на заедничка историја и блиските врски на двата народи, но и заедичката определеност за иднина.
– Соработката со соседните земји во чувањето на мирот и стабилноста на регионот, тежнеењето на полноправно членство кон ЕУ, се приоритети на надворешната политика на Република Србија и овие наши приоритети веројатно секој би помислил дека се приоритети, што и така е, и на РС Македонија, рече Селаковиќ.
Заедничката желба за соработка и зајакнување на мостовите кои не поврзуваат, забележа дека се гледа и низ историската иницијатива на „Отворен Балкан“ каде три држави направија сериозен исчекор во насока на економака соработка и подобрување на квалитетот на живот на сите свои граѓани.
– Институцијата на почесен конзул во Република Србија има долга и богата традиција и големо значење во дипломатско – конзуларните односи. Република Србија денес го добива 86-тиот почесен конзулат во странство. Во нашата земја, во Белград и во другите градови има 35 странски почесни конзулати, информира шефот на српската дипломатија.
Тој изрази уверување дека отворањето на Конузлтот во Охрид, кој ги покрива териториите на општините Охрид, Струга, Дебрца, Вевчани, Дебар и Центар Жупа, ќе овозможи унапредување на соработката на Република Србија со Македонија.
– Тоа што денес го правиме еден ден ќе биде историја, а на тоа што е историја не можеме да влијаеме, но на ова што го работиме денес ние и тоа како влијаеме и така ја создаваме историјата. Ќе се бориме таа историја да биде проткаена со мир, стабилност, толеранција и пријателски односи, нагласи Селаковиќ.
Министерката за култура Костадиновска Стојчевска подвлече дека отворањето на Конзулатот е уште една потврда и силен поттик за унапредувањето и продлабочувањето на билатералната соработка меѓу нашите две блиски и пријателски земји во сите области од взаемен интерес, посебно на планот на економско-трговската соработка, културата и посебно во делот на туризмот.
– Охрид, како и досега, е привлечна дестинација за српските туристи, кои се секогаш добредојдени во што поголем број. Македонија и Србија имаат извонредни односи во областа на културата, кои се материјализираат низ реализација на голем број проекти од сите свери на творештвото.
Потврда за ова се и потпишаните програми за културна соработка меѓу министерствата за култура на двете земји, кои особено придонесоа во зацврстувањето на културните врски и ги охрабрија новите иницијативи, рече министерката за култура.
Најави дека наскоро треба да биде потпишана и новата програма за културна соработка која значително ќе ја зголеми презентацијата на македонската култура во Србија, но и претставувањето на српската култура во нашата земја.
– Развитокот на културниот простор во кој сложено живееме и во кој учиме едни од други, создава предуслови и за развој на економските и на политичките врски, затоа што, сепак, се почнува со култура и се завршува со култура.
Пред нас постои силен предизвик да се впуштиме во оформување на заедничките интереси важни за иднината на нашето минато и за идентитетот на нашата сегашност, подвлече Костадиновска Стојчевска.
Во името на Локалната самоуправа присутните ги поздрави градоначалникот на Општина Охрид Кирил Пецаков, кој посочи дека македонскиот и српскиот народ имаат вековна поврзаност, која е втемелена на заедничка историја и отсекогаш биле пример за взаемна доверба и добрососедство.
– Тоа особено се однесува на традиционалните партнерства во сите сфери на општественото живеење. Од денес, со отворање на почесниот конзулат на Република Србија во Охрид, создаваме нови можности за градење уште поцврсти мостови на заедништво и зближување меѓу нашите граѓани.
Се надевам дека тука ќе се родат многу нови идеи и иницијативи за остварување на стратешки интереси и унапредување на економската и стопанската размена, особено во делот на туристичките дејности, рече Пецаков.
Локалната самоуправа, додаде, секогаш ќе биде подготвена да го поддржи функционирањето на ова дипломатско претставништво и да даде придонес онаму каде што е потребно.
Почесниот конзул на Србија, Михајло Филев смета дека отворањето Конзулат во Охрид е голем подвиг во зближувањето на двата братски народи.
– Ваквиот чекор не претставува мост за зближиување, бидејќи мостот веќе постои, туку надградување на тој мост со нови чекори за поуспешна афирмација и презентација на српската добронамерност и, пред се, братска блискост покажана и докажана многу пати во минатото и денес.
Нека овој простор на почесниот Конзулат биде само средиште од каде во целост низ цела област ќе се воспоставува нашата соработка низ патот кој го продолжуваме генерациски за подостојно постојано културно и политичко поврзување, порача Филев.
Конзулатот ќе ги опфаќа со работа општините Охрид, Струга, Вевчани, Дебарца, Кичево, Дебар и Центар Жупа.
МИА/Фото: МИА/Министерство за економија