Во Струмица денеска се регистрирани рекордни 21 новозаболен од Ковид-19, односно вкупно 25 со четирите нови случаи во општина Валандово, која е во рамки на струмичкиот Центар за јавно здравје.
Според директорот на овој центар, Петре Витанов, секојдневните двоцифрени бројки на новозаразени се должат на непочитувањето на прописите и протоколите.
-Ако до пред десетина денови имавме заболени од познати кластери, повеќе не е така. Новозаразените се на различна возраст и од различни кластери. Апелирам на доследно почитување на прописите, бидејќи само така ќе можеме да го запреме ширењето на вирусот.
Потребна е поголема свест од граѓаните, бидејќи со такви бројки можеме да дојдеме во состојба да не може да го контролираме ширењето на вирусот, изјави директорот на Центарот за јавно здравје во Струмица, Петре Витанов.
Капацититети на Инфективното одделение во струмичката болница за прифат на заболени веќе десетина денови се полни, а раководството на болницата најавува дека од понеделник треба да бидат оспособени хируршките амбуланти, каде треба да бидат поставени 15 кревети за лекување на заболените од Ковид-19.
Во Струмица досега се регистрирани вкупно 293 заболени, од кои активни се 178 лица.
ПОВРЗАНИ ВЕСТИ
Нови шестмина тиквешани позитивни на Ковид-19, еден на Инфективно во Велес
Нов рекорд: 243 нови случаи на Ковид-19, во Скопје 98
МИА