Министерството за здравство информира дека утрово, на клиниките за Кардиохиругија и Урологија започна трансплантација на срце и бубрези од починат донор.
„По интензивни подготовки во текот на ноќта, рано утрово беше завршена експлантацијата на срце и бубрези на 42-годишна пациентка, која ја загуби битката со животот, а нејзина последна желба беше да ги донира своите органи.
Трансплантацијата на срце се врши кај пациент кој подолго време е на листата за трансплантација, а бубрезите ќе бидат трансплантирани кај двајца пациенти на 40-на години кои се на дијализа,“ информираат од Министерство за здравство.
Почнувајќи од мај 2020 до сега извршени се експлантации од седум починати донори, а трансплантирани се пет срца, 12 бубрега, едно коскено ткиво.
„Министерот за здравство Венко Филипче, целиот медицински тим, Министерството за здравство изразуваат сочувство до семејството на 42 годишната пациентка и неизмерна благодарност за нивната хуманост и добрина,“ се додава во соопштението.
Фото: Фејсбук/Филипче