Од обилните врнежи синоќа се излеа Маркова Река, па беа поплавени куќи, магацини и индустриски објекти во селата Студеничани и Батинци и делови кон населбата Пинтија, информираа од Центарот за управување со кризи.
Поплавување имало и на дел од булеварот „Борис Трајковски“ кај Пинтија.
Јавното сообраќајно претпријатие (ЈСП) Скопје информираше дека поради поплавите, автобусот број 70 сообраќа до почетна/крајна станица Дризла, а автобусот број 33 преку населбата Драчево во двете насоки.
Македонски железници информираа дека железничкиот патнички и товарен сообраќај, од синоќа во 22:50 часот бил во прекин во правец на Лисиче и Драчево и обратно, додека патничкиот сообраќај се одвивал преку станицата Трубарево.
Од Министерството за внатрешни работи денеска информираа дека се уште е затворен за сообраќај во двете насоки локалниот пат село Горно Лисиче – село Долно Лисиче, како и влезот за селото Батинци во двете насоки.
Видео: ТВ 21