Македонија има три авиони за гасење пожар, ама нема пилоти. Агенцијата Мета објави дека моментално има само еден активен пилот, а другите двајца заминале во пензија.
Заради започнатиот изборен процес, Државната комисија за спречување на корупција (ДКСК) не и дозволува нови вработувања на Дирекцијата за заштита и спасување (ДЗС).
Директорот на ДЗС, Беким Максути за Мета потврди дека има само еден пилот и вели дека огласот за вработување на четири нови пилоти ќе се распише веќе следниот ден по изборите, а дотогаш се надева дека двајцата пензионирани пилоти ќе се вратат на работа.
„Два пати се обративме до ДКСК и добивме негативно мислење за нови вработувања. Заради тоа се обративме до Владата за да ни одобрат да ангажираме двајца пензионирани колеги, кои ќе може да ни помогнат додека се реализира огласот, а потоа и обуката на пилотите.
Сепак, сега се соочуваме со уште еден проблем, треба да обезбедиме повисоки плати за пилотите за да се согласат да се вратат“, вели Максути, кој стравува дека и огласот за нови вработувања во Дирекцијата нема да биде успешен заради неатрактивните плати кои ги нудат споредено со обврските, бројот на работни часови и ризикот на работата.
Фото: ДЗС