Мијалков: Никој од моето семејство и обезбедување не стои зад нападот на Златев

Поранешниот прв човек на Управата за безбедност и контраразузнавање (УБК), Сашо Мијалков се огласи на Фејсбук по тврдењето на новинарот Љупчо Златев, дека бил нападнат од обезбедување на неговиот син.

“Насилството врз новинари е неприфатливо и доколку имало таков случај го повикувам МВР да го расчисти.

Ниту некој од моето семејство, ниту некој од моето обезбедување кое е составено од професионалци не учествувал во никаков инцидент и сигурен сум дека тоа ќе се докаже откако ќе се расчистат сите детали.

Тоа што во моментов се прави е реализација на уште една хајка против мене, преку медиумите под контрола на Христијан Мицкоски.

Во изминативе две години Мицкоски нарачуваше десетици измислени и неточни текстови само за да ја покрие сопствената неспособност да ја води партијата и да понуди визија која што ќе ги привлече граѓаните.

Измислуваше дека тестовите за Ковид 19 кои што беа донирани биле неквалитетни, а се најдобрите во светот.

Измислуваше дека сум добивал тендери во здравство, а немам никаков допир со тој бизнис.

Вчера измисли дека сум имал стан во Охрид, а денес измисли дека моето обезбедување учествувало во физички напад и за тоа ги злоупотребува медиумите блиски до партијата.

Затоа ќе ти порачам, Христијан занимавај се со тоа што ти е работа. Три години времето го трошиш на мене, наместо да работиш на програма и понуда.

Три години го трошиш просторот во медиумите кои се критички кон власта за пласирање на лаги за мене, наместо да го искористиш за обединување на членството и жесток и конструктивен напад кон власта.

Видовме до каде те доведе тоа. Наместо сигурна победа, сега секој член на ВМРО ДПМНЕ е во исчекување дали ќе направиш Влада.

Малку време ти остана, а ти наместо да преговараш со потенцијални партнери за коалиција и да обезбедуваш меѓународна поддршка, повторно се занимаваш со мене.

Твој е изборот, но да знаеш дека и јас и останатите членови на ВМРО ДПМНЕ очекуваме да успееш да го исполниш последното ветување да составиш влада, и ќе бидам еден од првите кој што ке ти честита, но доколку не успееш тогаш очекуваме да имаш доблест и да си стоиш на зборот дека ќе си поднесеш оставка“, пишува Мијалков.

ПОВРЗАНИ ВЕСТИ

Новинарот Љупчо Златев нападнат во ресторан, фотографијата од напаѓачот денеска ќе ја однесе во полиција

Фото: А1он