Во втората половина на февруари ќе биде распишан јавниот повик за изградба на интерконекторот за природен гас со Република Грција, а изградбата би требало да заврши до крајот на 2024 година, информираше министерот за економија, Крешник Бектеши.
-Во моментов се работи и на нов интерконектор со Република Србија, додека за интерконектор со Косово, за косовската страна ги подготвивме како документација сите процедури. Ја очекуваме нивната одлука дали да се продолжи градбата во нивниот дел.
Обрските од наша страна се завршени, се очекува одлука од косовската страна за реализација на овој проект, појасни Бектеши на панел дискусијата „Северна Македонија како зелен енергетски хаб- како да се претвори кризата во можност“ на вториот ден од конференцијата „Година на нови можности“.
Тој истакна дека речиси сите компании во склоп на ТИРЗ-овите се снабдуваат со природен гас.
Природниот гас, како што информира, е од Турција и од Грција, односно оти имаме различни извори.
Во моментот како што потенцираше министерот се користи зголемениот капацитет на гасоводот со Бугарија за испорака на гас.
-Да, се користат тие зголемени капацитети од страна на ЕСМ Продажба, која се занимава со увоз и снабдување со природен гас на нивните постројки, но и за другите потрошувачи како што е индустријата.
Најважно од се е, дека природниот гас кој што се увезува е од ЛНГ-терминалите од Турција и еден дел во Грција, што значи дека имаме различни извори од тоа што сме имале претходно и не сме зависни само од еден извор кој претходно беше „Гаспром“, рече Бектеши.
Според министерот, гасот во складиштата во Турција и Грција се чува во течна форма пред да биде превземен, а во Македонија доаѓа преку единствената гасоводна врска со Бугарија.
Според него доколку целосно се оствари Националниот план за целосно гасифицирање на државата и нејзиното поврзување со соседите секако дека постои можност Македонија да стане енергетски хаб и да ги ужива придобивките од извозот на природен гас кон соседните земји.
Фото: Влада