Во јуни 2018 година во Фондот на пензиското и инвалидското осигурување евидентирани се 313.679 пензионери, што претставува зголемување од 2,3% во однос на истиот период минатата година.
На месечно ниво, бројот на корисници на пензија е повисок за 1.647 лица. Од вкупниот број пензионери, 64,1% се корисници на старосна пензија, 24,4% се корисници на семејна пензија и 11,6% се корисници на инвалидска пензија. Просечната пензија во јуни 2018 година изнесува 14.150 денари и е за 2,1% повисока во однос на истиот месец минатата година.
Соодносот на просечната пензија со просечната исплатена плата во мај 2018 година (последни расположливи податоци) изнесува 57,6%. Просечната старосна пензија во јуни изнесува 15.450 денари, просечната инвалидска пензија изнесува 12.836 денари, а просечната семејна пензија 11.355 денари. За исплата на пензиите во јуни 2018 година се потрошени 4,3 милијарди денари, што претставува 50,9% од вкупните социјални трансфери.