Двајцата полицајци кои тврдеа дека биле измамени од затвореник се суспендирани, информираше министерот за правда, Кренар Лога.
ПОВРЗАНИ ВЕСТИ
Во изјава по денешниот брифинг со медиумите, министерот Лога рече дека од моментот кога се информирал за случајот, побарал од Управата за извршување на санкции да постапи.
– Денеска во комуникација со новиот директор на КПД Идризово е преземено тоа и двајцата полицајци се суспендирани до разрешницата на овој настан, рече министерот.
Управата за извршување санкции (УИС) претходно соопшти дека на 19.09.2023 година извршила вонреден наздор во КПД Идризово со цел да се проверат наводите на осудените лица Тони Денковски и Јанко Јаневски за закани по живот, рекет и уцени.
– Во врска со наводите на Јанко Јаневски кој отслужува 9-годишна затворска казна, дека имал уцени и закани по живот да врати 4.000 евра во рок од 24 часа, Управата за извршување на санкции изврши разговор со двајца припадници на затворската полиција кои тврделе дека биле измамени од Јаневски кој им побарал по 2.000 евра ветувајќи им дека ќе бидат префрлени со работа во МВР.
Вкупната сума од 4.000 евра му ги исплатиле на негов пријател во трговскиот центар „Сити мол”. Командирите по извесен период сфатиле дека се измамени и настанот го пријавиле во ПС Кавадарци, соопштија оттаму.
Службените лица од Управата разговарале и со осуденото лице Јанко Јаневски, кој појаснил дека никогаш не зел пари од припадници на затворската полиција, туку напротив, дека лично тој му давал пари на Киро Димов, припадник на затворската полиција.
Осудениот Јаневски парите ги добивал од спортско обложување кое се организирало во установата и на неколку наврати му позајмувал пари на Димов. Потоа почнал да му се заканува преку осудени лица за враќање на долгот во рок од 24 часа. За наводите дека припадникот на затворската полиција земал пари од Јаневски, потврдиле и две други осудени лица.
Во однос на осуденото лице Тони Денковски за неговата поплака дека му е нарушена безбедноста и дека има закани и уцени од страна на осудени лица и припадници на затворската полиција, за што е поднесена и пријава до Основното јавно обвинителство за организиран криминал и корупција, од разговорот со него тој не посочил конкретни имиња на осудени лица или припадници на затворската полиција поради што не можело да се проверат неговите наоди.
За Денковски, во дневните билтени не е евидентиран некаков настан или физички напад на ова лице, а преземени се и мерки за заштита на неговата безбедност, сместен е сам во соба и сам оди на прошетка.
До денот на извршениот надзор осуденото лице Тони Денковски, како што информираа УИС своевремено, нема поднесено барање за преместување во друга установа.
МИА/Фото: Влада