Пратеникот на ВМРО-ДПМНЕ, Бране Петрушевски е првиот пратеник кој е осуден за клевета за став искажан од собраниската говорница.
Според пресудата која ја донесе Основниот суд Куманово, тој на пратеникот од владејачката СДСМ, Мартин Костовски, треба да му исплати околу две илјади евра плус камата за душевна болка предизвикана од навреда.
Судијата Неџат Мемети го осуди без да му го одземе пратеничкиот имунитет, а Петрушевски реагираше на Фејсбук за пресудата, бидејќи неговиот имунитет е заштитен со Уставот, Законот за пратеници и Законот за граѓанска одговорност за клевета и навреда.
Според член 16 од Законот за пратеници, пратеникот не може да биде повикан на кривична или друга одговорност или да биде притворен за искажано мислење или гласање на седниците на Собранието или на неговите работни тела.
Во Законот за граѓанска одговорност за клевета и навреда, пак има дел во кој се наведени исклучоци од одговорност и во него стои дека: „нема одговорност за навреда, ако: изјавата е дадена во работата на Собранието, на советите на општините и градот Скопје, во управна или судска постапка или пред Народниот правобранител, освен ако тужителот докаже дека е дадена злонамерно“.
Петрушевски најави жалба и ќе бара од Судскиот совет да биде разрешен судијата кој го осуди.
Фото: Фејсбук/Петрушевски