На првиот успешно реализиран настан на „Алкалоид“, „Развој на лидерството“, менаџерските тимови од земјава и од странство имаа можност да се запознаат со најновите трендови за јакнење на клучните лидерски вештини низ развој заснован на вредности и на ефектно донесување одлуки, информираат од таму.
По воведното обраќање на генералниот директор и претседател на Управниот одбор на „Алкалоид“ АД, Живко Мукаетов, говорници на настанот беа еминентни светски експерти од областа: Хари Крамер, поранешен извршен директор на „Бакстер интернешанал“, автор, професор и извршен партнер во „Келог школа за менаџмент“, и Оливие Сибони, поранешен сениор партнер во „МекКинси & компани“, француски консултант, академик и автор, професор на „ХЕК Париз“.
„Лидерството денес не подразбира само привлекување на квалитетен кадар туку и негово задржување во компанијата, преку мотивирање и насочување во вистинска насока, бидејќи секој производ, секој бренд, секој потфат на Алкалоид е воден од луѓето пред се. Добрите лидери секогаш инспирираат и оттаму создаваат нови лидери,“ истакна Мукаетов.
Наменет за менаџерскиот тим на „Алкалоид“ во земјава и во ентитетите во странство, овој настан е уште еден доказ за целосната посветеност на компанијата за јакнење на лидерските способности и за инвестирање во професионалниот раст и развој на својот менаџмент.