Во холандскиот град Утрехт во пукање во трамвај денеска се убиени најмалку три лица, а девет повредени, некои од нив сериозно.
„Не може да се исклучи терористичкиот мотив во инцидентот“, изјави портпаролот на полицијата Бернхард Јенс, пренесуваат светските агенции.
Полицијата објави фотографија од осомничениот од надзорна камера, кого го именуваа како Ѓукмен Танис, на возраст од 37 години, роден во Турција, и ги предупреди луѓето самите да не му приоѓаат, туку да ги алармираат властите ако го видат.
Холандскиот премиер Марк Руте изјави дека сите напори се насочени да се фати „осомничениот или осомничените“.
„Нашата земја денес е шокирана со нападот во Утрехт“, изјави Руте.
„Полицијата и обвинителите истражуваат што точно се случило“, посочи премиерот.
Фото: ЕПА/АП/Твитер/Полиција Утрехт /Видео: АП