Главниот акционер на поранешната Еуростандард банка, Трифун Костовски во колумна со наслов „И тоа е можно…“ објавена на интернет порталот „Либертас“ потврди дека по завршување на предистражната постапка што ја спроведува Јавното обвинителство му е блокиран целокупниот негов имот.
„Почитувани, со завршување на предистражната постапка, мојот личен имот ми е комплетно блокиран. Говорам за имот кој е стекнат пред повеќе од 35 години, ама ако е во интерес на правдата и вистината, немам ништо против“, пишува тој во колумната.
Со ова мерка за обезбедување, всушност му се оневозможува на Костовски да го отуѓува својот имот се до завршување на истрагата што ја покрена Обвинителството, откако претходно Народната банка поднесе кривични пријави за предизвикување на стечајот на Еуростандард банка.
При поднесувањето на кривичните пријави Народната банка соопшти дека побарала да се спроведат дополнителни мерки во насока на натамошна заштита на интересите на штедачите и доверителите.
Засега ниту судот, ниту Обвинителството се уште ја немаат потврдено оваа информација.
Фото: Телма