еМагазин
Image default
Македонија

Цел владин кабинет на социјални мрежи: 23 користат „Фејсбук“, а 14 се активни на Твитер“ и „Инстаграм“

23 од 26 министри во Владата на Република Македонија активно користат Фејсбук, покажа втората годишна Анализа направена во периодот од 23 до 28 Јули 2018 година. Споредено со минатата година, ова претставува зголемување за 3 на бројот на министри кои се активни на оваа мрежа.

Анализата и оваа година покажува дека поголемиот број на членовите на владиниот кабинет и нивните тимови секојдневно објавуваат содржини за своите активности на Facebook и имаат отворени профили или страни на кои можат граѓаните да им пишат јавно или, пак, во приватна порака. Повеќе од половината од министрите имаат истовремено свој профил, но и страна на овој социјален медиум.

Бројката останува непроменета и оваа година, односно премиерот Зоран Заев и уште 4 министри имаат верификувани страни – потврда од Фејсбук дека таа страна е на автентична личност.

Зголемување е забележано кај Твитер кој годинава го користат 14 членови на Владата, а исто толку се присутни и на Инстаграм. Анализата од минатата година покажа дека во 2017 година Твитер користеа 8 министри, додека вкупно 10 беа активни и на Инстаграм.

Премиерот Заев и 10 други министри се активни и имаат свои профили/страни истовремено на Фејсбук, Твитер и Инстаграм, што претставува зголемување за 4 споредено со минатата година.

Само двајца членови на Владата, вицепремиерот Кочо Анѓушев и министерот Роберт Поповски, воопшто немаат свои профили/страни на овие социјални медиуми. Ова е подобрување споредено со 2017 година кога дури 6 министри не биле активни на ниту еден социјален медиум.

„Сите министри е важно да бидат присутни со свои страни или канали на социјалните медиуми, а со цел непосредна и двонасочна комуникација со граѓаните. Во Анализата и оваа година е наведено дека објавите, коментарите и одговорите на прашањата не е потребно директно да ги врши министерот, туку тоа може да го прават нивните онлајн тимови, по претходна добиена согласност во име на министерот/ката“, вели Бојан Кордалов, специјалист за односи со јавност и нови медиуми, кој истовремено е и автор на истражувањето.

Еден од заклучоците во оваа Анализа е дека позитивно е што расте бројот на активни членови на Владата на Твитер и Инстаграм, а не само на најпопуларната мрежа – Фејсбук. Но, со цел вклучување на сите целни групи и целокупната јавност во комуникациската стратегија на Владата, потребно е сите министри да имаат свои активни страни/канали на социјалните медиуми.

„За поздравување е податокот дека е прифатена сугестијата од минатогодишната анализа и на веб страната на Владата на видливо место е поставен дел со контакти од страните или каналите на социјалните медиуми на членовите на владиниот кабинет. Со ова, граѓаните можат од едно место директно да се обратат до секој од министрите, да дадат своја иницијатива, но и постават прашање на кое ќе добијат одговор“, посочи Кордалов.

Динамиката на објави е потребно да биде секојдневна и тоа со најмалку 2-3 објави дневно на сите социјални медиуми. Според Кордалов, на овој начин Владата дополнително ќе ја покаже својата заложба за отчетност и транспарентност, а секој заинтересиран граѓанин кој е активен онлајн ќе има можност да биде запознаен со активностите на министерот/ката, ставовите и иницијативите, како и да има можност да даде свој став, мислење или пак, да изрази поддршка/критика или да даде свој предлог.

Преземањето на оваа содржина или на делови од неа без непосреден договор со редакцијата на еМагазин значи експлицитно прифаќање на условите за преземање, кои се објавени ОВДЕ.

МОЖЕБИ ЌЕ ВЕ ИНТЕРЕСИРА

Заев: Ќе ја испочитуваме Венецијанската комисија за Законот за употребата на јазиците

Редакција

Потпретседателката на организацијата на Боки 13, Јасна Мандиќ за „Рекет“ со полиција донесена во Обвинителство

Редакција

Димитров дебатира сам со себе дали да се кандидира за претседател

Редакција