Државата треба да му исплати 6.100 евра оштета на поранешниот министер за транспорт и врски, Миле Јанакиески, за притворот за случаите „Организација на 27 април“ и „Шпански скали“, стои во пресудата на Европскиот суд за човекови права и слободи.
Според пресудата, на поранешниот министер му биле прекршени правата од членот 5 на Европската конвенција за човекови права.
„Предметот се однесува на две кривични постапки против Јанакиески, првата за терористичко загрозување на уставниот поредок и безбедноста, а втората за злоупотреба на службената положба, при што со одлуки на домашните судови тој беше лишен од слобода.
Потпирајќи се на член 5 (право на слобода и безбедност) од Конвенцијата, Јанакиески се жали на наводна незаконитост и самоволие, немање релевантни и доволни причини и недостиг на брзо преиспитување на неговото лишување од слобода.
Утврдена е повреда на член 5 став 3 поради немање доволно причини за лишување од слобода на жалителот и повреда на член 5 став 4 поради недостиг на ‘брзо’ преиспитување на лишувањето од слобода на жалителот“, се вели во пресудата, според која, државата ќе треба да му плати 3.900 евра за нематеријална штета и 2.200 евра за трошоци.
ПОВРЗАНИ ВЕСТИ
Фото: Јанакиески/Фејсбук