Монтажниот објект за болничко лекување на ковид позитивни пациенти во кругот на тетовската клиничка болница е при крај. Надворешната работа е целосна готова со изградба на основа и поставување монтажни ѕидни панели, а започнато е со работа и во внатрешноста.
– При крај се сите работи, се работи на поставување на санитарија и електрична инсталација за модуларната болница. Мислам дека за една до две недели ќе биде целосно готова и ќе може да се примаат пациенти, изјави д-р Гзим Нуредини, координатор во Ковид-центарот.
Во моментот во Ковид-центарот има 15 лица од кои 10 се со потешка клиничка слика и затоа се на болничко лекување.
– Само денес се примени тројца пациенти на болничко лекување. Амбулантски прегледи има околу 35 пациенти во една смена и има тендеценија на зголемување, но тоа не значи дека сите се заболени од Ковид-19.
Бројот на починати е некаде 1 до 2 просечно во моментот. Баравме и со мали симптоми да се јават во Ковид-центарот или кај матичен лекар, изјави д-р Нуредини.
Во последната денешна евиденција на заболени од Ковид-19 за тетовскиот регион има 316 активни случаи. Пред еден месец или на 28 декември 2020 имаше 878 активни случаи.
МИА/Фото: МИА