Имотот не е ВМРО-ДПМНЕ, туку народот, а ваквата политичка одлука на судството на СДСМ и ДУИ нема да не поколеба во нашата борба, рече денеска претседателот на ВМРО-ДПМНЕ Христијан Мицкоски во врска со судската одлука за „Талир 2“.
По средбата со комесатот за проширување на Европската унија, Оливер Вархеји во Охрид, Мицкоски, одговарајќи на новинарски прашања, истакна дека во овие триесет години независност, ВМРО-ДПМНЕ поминало низ многу премрежја.
-Ќе го помине и ова, бидејќи имотот за кој се побара конфискација, не е ВМРО, туку народот е ВМРО и ова партизираното и октроирано судство и обвинителство на СДСМ и ДУИ не го суди ВМРО-ДПМНЕ, туку Македонија и македонскиот народ. Денеска ја добивме првостепената пресуда. Ова партизирано октроирано судство и обвинителство решило да го суди ВМРО-ДПМНЕ, меѓутоа, тоа не го суди ВМРО-ДПМНЕ, туку го суди македонскиот народ, ја суди Македонија, рече Мицкоски.
Според него, „уште еднаш се покажало дека ВМРО-ДПМНЕ е единствената пречка за разнебитување на македонскиот идентитет и македонската држава од овие октроирани партизирани судии и обвинители на СДСМ и ДУИ“.
-Ние ќе продолжиме да ја бараме правдата, ќе се бориме, нема да се повлечеме. Ако некој мисли дека ВМРО-ДПМНЕ оваа пресуда ќе го обесхрабри, се лаже. Ова само дополнително ќе не мотивира да дојдеме до правдата и нашата борба да ја ослободиме Македонија од овие криминални политичари, да го ослободиме обвинителството и судството од закани, притисоци и од стегите, ќе продолжи.
Ќе повторам уште еднаш, ВМРО-ДПМНЕ и ВМРО не е имотот, ВМРО-ДПМНЕ и ВМРО е народот на Македонија и самата Македонија. Продолжуваме да се бориме се додека конечно не ја добиеме правдата, рече Мицкоски.
ПОВРЗАНИ ВЕСТИ
Случај „Талир 2“: Имотот на ВМРО-ДПМНЕ не е заслуга на две лица, вели адвокатот на партијата