Папата си замина, се беше како што треба, само злобен мрчатор може да најде фалинки во организацијата, Стево Пендаровски е новиот претседател на државата, па нејзиниот курс е сигурен, како што тврди власта, која рече дека ја сфатила пораката од граѓаните на последните избори, (барем дел од неа), сега останува најважното, што ги интересира граѓаните, да мрднеме малку и ние.
Власта нема веќе простор за оправдување и грешки. Се знае што треба да прави и кои реформи треба да ги спроведе, не само за да добиеме датум за старт на преговорите со ЕУ, туку пред се за подобра иднина на граѓаните кои и покрај се, решија да останат да живеат овде, за сега.
Прво и основно, ни требаат повисоките плати, кои ни беа ветени, повисок животен стандард, подобро здравство, правда за сите… да не редиме, познато е се што треба.
И секако редно е „метлата“ која неколку пати ја спомнува премиерот во последните речиси две години, откако ја води државата, квалитетно да „заигра“ и убаво да се смете.
Да не се става „ѓубре“ под тепих, како што сме навикнати, туку и на овој проблем квалитетно да му се пристапи, како што власта знае да се пофали дека со сериозен однос ги решила проблемите со соседите.
За метли, не е проблем, ако треба ние ќе се организираме и ќе собереме да има доволно.