Проф. д-р Биљана Ангелова од Економскиот институт е новиот ректор на Универзитетот „Св. Кирил и Методиј“.
ПОВРЗАНИ ВЕСТИ
Биљана Ангелова избрана за нов ректор на Универзитетот „Св. Кирил и Методиј“
Таа ќе го наследи актуелниот ректор, проф. д-р Никола Јанкуловски од Медицинскиот факултет, кој функцијата ректор на Скопскиот универзитет ја извршуваше два мандата.
Која е Ангелова
Ангелова е вработена на Економскиот институт од 1992 година, каде во континуитет ги добива сите научни и наставно-научни звања, стои во нејзината биографија.
Во 2007 година за првпат е избрана во највисокото научно звање научен советник/редовен професор во областа на деловни финансии, а во 2012 година повторно е избрана за редовен професор во областа на финансиски менаџмент.
Во периодот 2006-2008 година била раководител на вториот циклус студии по Меѓународен менаџмент, а од 2008 година до денес раководи со насоката Финансиски менаџмент.
Таа беше и прв раководител на студиите од трет циклус по организациски науки – менаџмент на Универзитетот „Св. Кирил и Методиј“ во Скопје во периодот 2012-2016 година.
Од ноември 2009 до септември 2016 година била директор на Економскиот институт.
Во јуни 2016 година е избрана за проректор за финансии, инвестиции и развој на Универзитетот „Св. Кирил и Методиј“ во Скопје, на која функција е и вторпат избрана и во 2020 година за мандатниот период 2020-2023 година.
Од 2016 до 2023 година е претседател на Комисијата за финансии и на Комисијата за издавачка дејност на УКИМ.
Фото: УКИМ/Ангелова