„Секако дека нема да дозволам неколку криминалци, еден суетен новинар, и да ме извини ЛГБТИ заедницата, еден педер да ја симнат оваа Влада од власт. Не. Ќе се бориме до крај затоа што секој кој се инволвирал секако ќе си носи одговорност“.
Оваа изјава на премиерот Зоран Заев предивика лавина реакции од здруженија на новинарите, Агенцијата за аудио и аудиовизуелни услуги, невладините организации…
Агенцијата за аудио и аудиовизуелни медиумски услуги преку соопштение побара премиерот да се воздржи од дискредитирање, етикетирање и дискриминирање.
Осудувајќи ја изјавата АВМУ посочи дека таа е проблематична најмалку по три основи.
„Премиерот, како носител на јавна функција, наместо да ја прифати и да ја почитува улогата на новинарите како критичари на работата на власта се обидува да дискредитира новинар. Наместо да покаже највисоко ниво на почитување на различностите, тој употребува етикетирање кое што е дерогирачко за ЛГБТ-лицата. Заев во својата изјава исто така не ја почитува ниту пресумпцијата на невиност“, укажа АВМУ.
Здружението на новинарите на Македонија, исто така, во реакција ја осуди изјавата на Заев и повика тој да им се извини на новинарите.
„Ваквиот агресивен говор кон новинарите од страна на претседателот на Владата може да поттикне насилство кон нашите колеги, а со тоа и дополнително да се загрози нивната безбедност и да се ограничи слободата на изразувањето“, оцени ЗНМ, забележувајќи воедно и дека „непримерниот говор во однос на припадниците на ЛГБТИ заедницата не доликува на сериозен политичар и носител на таква висока функција.
Со осуда и барање од премиерот да се извини излезе и Македонската асоцијација на новинари (МАН), од каде сметаат дека изјавата преставува директна закана кон медиумите и новинарите и формите на слободно изразување.
ПОВРЗАНИ ВЕСТИ
Заев се извини на ЛГБТИ заедницата: Зборот „педер“ го употребив за да дадам карактерна особина
Фото: Влада