Министерот за здравство, Венко Филипче соопшти дека Владата ја усвоила препораката од Комисијата за заразни болести и од утре се затвораат школите, градинките и универзитетите во цела Македонија.
Освен оваа одлука, издадена е забрана и на сите масовни собири на отворено и на затворено со над 1.000 учесници, а сите спортски собири да бидат без публика.
Се воведува и задолжителна самоизолација на сите лица кои доаѓаат од високо и средноризични држави во период од 14 дена.
Забранет е извоз на медицинска опрема и медицински средства и материјали од економски оператори од земјава, освен со посебна дозвола од Министерството за здравство.
Филипче апелираше возрасните и поризичните категории граѓани со хронични болести да го ограничат движењето и да го избегнуваат јавниот превоз.
Исто така, се забранува патување во земји кои се од висок и среден ризик, а листата на овие земји ќе биде поставена на веб-страницата на Министерството за здравство и ќе биде секојдневно ажурирана.
Се препорача вработените во здравствените установи кои се ангажирани во изборниот прецес да бидат изземени од натамошно учество и да бидат заменети со други лица.
За тие кои нема да ги почитуваат и ќе ги прекршат препораките, Комисијата истакнува дека ќе бидат казнети по член 205 и 206 од Кривичниот законик.
ПОВРЗАНИ ВЕСТИ
Ќе ги имаме ли првите избори без митинзи поради корона вирусот?