Од Управата за хидрометеоролошки работи (УХМР) известуваат дека во текот на попладневните часови се најавува нестабилност на времето, при што се очекуваат поројни врнежи од дожд, проследени со силен ветер, град и процеси во форма на невреме.
Поради можноста од краткотрајни интензивни врнежи од дожд локално е можно нагло и рапидно зголемување на водостојот на помалите реки низ земјава и суводолиците.
Исто така, во дел од градските урбани средини и населените места поради карактерот на очекуваните врнежи (интензивни со кратко времетраење) можна е локална појава на брзо истекување на атмосферската вода и појава на локални проблеми.
После врнежите во изминатите неколку дена, водостоите на реките се надпросечни и прилично високи. И покрај најавениот локален карактер на врнежите, се очекува и кај поголемите реки да останат високи водостоите и да бележат тенденција на благо покачување.
„Според дел од моделите за временска прогноза, источните и југоисточните делови од земјата ќе бидат подлежни на нешто поголеми врнежи во текот на попладневните часови и ноќта, каде ќе има услови за зголемување на водостоите на реките во овие делови. Поради очекуваниот пороен карактер на врнежите можна е појава на одрони и свлечишта.
Препорачуваме на внимателно движење покрај реките и суводолиците, како и на оние места каде во текот на денот и вешерните часови ќе има поројни врнежи од дожд,“ се вели во соопштението.
Фото: Игор Бансколиев