Очигледен дефокус во јавноста се обидуваат да направат одредени структури во земјава по контроверзното интервју на премиерот Зоран Заев за бугарската БГНЕС.
Провладините медиуми и претставници побрзаа да објаснат дека цел бугарски народ денес не може да го носи епитетот фашисти само затоа што Бугарија била окупатор во земјава во Втората светска војна.
Но, тоа е банален обид да се изместат сликата и тезите во однос на спорот што го наметнува Бугарија која упорно тврди дека во земјава континуирано се негува говор на омраза кон бугарскиот народ.
Тоа едноставно не е така. Во Македонија никој не вели дека Бугарија денеска е фашистичка земја, ниту пак дека Бугарите се фашисти, но затоа цел свет знае дека оваа земја била на погрешната страна на Втората светска војна и тоа не може да се избрише од учебниците затоа што се друго би било лага.
Дефокусот е дотолку поголем, бидејќи некако набрзина се заборави дека официјална Бугарија бара многу повеќе од македонската страна односно да се признае дека македонскиот народ и македонскиот јазик потекнуваат односно имаат корени од Бугарија.
Значи вистинскиот проблем е што Бугарија во 21 век сака да каже дека ние сме биле Бугари, но дека сме биле изложени на пропаганда и ете сега сме збунети.
Простете, но тоа тешко дека ќе помине кај македонскиот народ.
ПОВРЗАНИ ВЕСТИ
Захариева: Бугарија ги блокира преговорите со Македонија поради „говорот на омраза„