Микробиологот Никола Пановски кој воедно е и претседател на Комисијата за контрола на антимикробна резистенција (АМР) на Македонија информираше дека бројот на реализирани рецепти преку Фондот за здравствено осигурување (ФЗОМ) на азитромицин (Сумамед) е намален за 48.000, а на цефиксим (Панцеф) за 10.000 во декември во однос на ноември 2020.
„Број на реализирани рецепти на азитромицин: септември 18.618, пропишани на 11.963 осигуреници, октомври 42.414, за 25.570 осигуреници, ноември 70.115 рецепти, 41.055 осигуреници и декември 22.575 рецепти за 14.656 осигуреници.
Ништо страшно не се случи со практикување на медицина базирана на докази, напротив, пациентите се заштитени од непотребно давање на антибиотици, од двојни токсични дози на азитромицин.
Според пресметките на ФЗОМ, само за декември заштедени се околу 200.000 евра од азитро и цефиксим. Најмалку уште толку останале во џебот на граѓаните кои инаку би ги купиле овие лекови.
Благодарност до м-р Кристина Христова и нејзиниот тим од ФЗОМ, до сите колеги и пријатели за поддршката, до Фејсбук, печатените и електронските медиуми. Задоволен сум зошто ова е доказ дека некои крупни работи можат да се постигнат и без помош на МЗ, ЛКМ, МЛД, бројни специјалистички здруженија, на кои им благодарам што иако не помогнаа, не одмогнаа,“ напиша Пановски на Фејсбук.
Инаку тој пред Нова година предупреди на прекумерното и непотребно препишување на антибиотици од страна на матичните лекари во лечењето на пациентите болни од Ковид-19.
ПОВРЗАНИ ВЕСТИ