Од неформалната група „Кој е следен?“ по трагедијата во Кочани за утре во 18 часот повикаа на јавен собир во Скопје и низ земјава.
„Македонија повторно е завиена во црно. Уништени и во грч седиме пред екраните во исчекување на нова поголема бројка, во исчекување на нова поголема тага. 59 млади лица не го видеа денешниот ден. Дупло повеќе се во болници и тешко повредени.
Ние, како и децата во дискотеката, сме повторно беспомошни и оставени сами на себе. Во овие траорни денови, Македонија треба да биде заедно. Треба да си бидеме рамо за плачење и треба да си дадеме еден на друг утеха, ако воопшто и можеме“, се вели во најавата за јавниот собир.
Оттаму повикаа на заедништво во ужасот и ги повикаа сите луѓе низ цела Македонија да се соберат на плоштадите во своите градови и, како што велат, да не поминуваат низ ова сами.
„Повикуваме во чест на починатите да се поделат црни ленти, за како народ да покажеме дека згаснатите животи нема да бидат заборавени. Тек допрва ќе доаѓаат црните денови за нас, а низ Македонија заедно ќе се тагува и плаче. Така, ќе треба и Македонија заедно да се лечи“, се посочува во повикот.
ПОВРЗАНИ ВЕСТИ
(Видео) Револт и тага: Студентите се собраа пред платото на УКИМ за трагедијата во Кочани
(Видео+фото) Протест во Кочани: На неколку лица им се слоши
Фото: Фејсбук/Инстаграм