„Прилепска пиварница“ во првото полугодие од 2019 година оствари добивка од 31 милиони денари, што е намалување во однос на истиот период минатата година кога добивката на компанијата изнесувала 67 милиони денари, покажува билансот на успех на компанијата објавен преку Македонската берза.
„Во период 01.01. до 30.06.2019 година остварен е вкупен приход во износ од 873.084.599 денари кој во споредба со остварениот вкупен приход во истиот период од 2018 година покажува остварување од 98,83%. Во структурата на приходите најголемо учество има приходот од продажба на производи и услуги на домашен пазар каде остварувањето изнесува 95,00% и приходите од продажба на трговски стоки на домашен пазар каде остварувањето изнесува 123,01%.
Неисполнувањето на вкупниот приход во наведениот период од 2019 година во споредба со 2018 година во најголем дел се должи на неповолните временски услови пред се во јуни месец, кој е сезонски и еден од ударните месеци во периодот, на не баш најповолните политички и економски состојби во земјата како и на видливиот одлив на дел од населението од земјата што доведува до опаѓање на прометот по стопанските субјекти (трговски и угостителски) и нивно затворање“, соопшти компанијата.
Фото: Прилепска пиварница