Шефовите на влади на државите членки на Европската Унија на вчерашниот самит ја потврдија препораката на Европската комисија и на Босна и Херцеговина и доделија статус на кандидат за членство во ЕУ.
Лидерите од членките на Унијата, без дискусија ја потврдија препораката која пред три дена ја договорија министрите за европски прашања – Босна и Херцеговина да добие статус на земја кандидат за членство во Европската унија.
Пред состанокот на министрите за европски прашања во вторник во Брисел, хрватскиот и грчкиот премиер Андреј Пленковиќ и Киријакос Мицотакис испратија писмо до претседателот на Европскиот совет, Шарл Мишел и претседателката на Комисијата, Урсула фон дер Лајен во кое ја истакнаа силната поддршка за европската интеграција на Босна и Херцеговина.
Пратеничката во Европскиот парламент Жељана Зовко, која ја поздрави одлуката на претставниците на ЕУ, потврди дека Европскиот совет донел таква одлука.
„Босна и Херцеговина официјално доби кандидатски статус за членство во Европската Унија. По препораката на Комисијата од октомври, шефовите на држави или влади на ЕУ и доделија кандидатски статус на БиХ за време на самитот на Советот на ЕУ во Брисел“, посочи Зовко.
Како што беше претходно нагласено во препораката, од Босна и Херцеговина се бара да работи на реформите, како и да ги исполни 14-те приоритети на Европската Комисија, кои Босна и Херцеговина ги доби во 2019 година.
„Ова вклучува мерки за зајакнување на владеењето на правото, борбата против корупцијата и организираниот криминал и управувањето со миграцијата. Реформските приоритети главно се однесуваат на 14-те приоритети презентирани од Европската комисија во 2019 година“, се наведува во одлуката на Европскиот совет.
МИА/Фото: Унсплеш