И бизнисменот Орце Камчев денеска заврши на црната листа на САД, информираше Канцеларијата за контрола на странски средства на Министерството за финансии на САД (OFAC).
„Камчев ја злоупотребил својата позиција, ангажирајќи се во коруптивни активности и спроведувајќи себична агенда на сметка на демократските институции и граѓаните на Северна Македонија“, стои во изјавата на потсекретарот на Министерството за финансии за тероризам и финансиско разузнавање, Брајан Е. Нелсон.
Како што образложија од американското министерство, Камчев е ставен на црната листа бидејќи интензивно се занимава со корупција, вклучително и злоупотреба на службената положба, перење пари и други прекршоци, повеќе од една деценија, почнувајќи од раните 2000-те.
Додаваат дека во 2022 година, Камчев бил осуден во судскиот процес „Парцели на Водно“ за учество во шема за перење пари поврзана со незаконско купување земјиште. Во одвоено судење, Камчев се изјасни за виновен за тешка злоупотреба на службената положба во случајот “Империја“, во кој беше осомничен за злосторничко здружување, измама, перење пари и други кривични дела поврзани со неговите бизниси.
Дополнително, посочуваат од Министерството, Камчев го искористил своето коруптивно влијание и богатство за да манипулира со судскиот систем на Македонија во негова корист. Во 2020 година, главниот обвинител на Специјалното јавно обвинителство (СЈО) беше обвинет за примање поткуп од Камчев и сведочеше дека платил пари во замена за поволни услови за апсење и исход на случајот. Камчев подоцна покрена граѓанска постапка против главниот обвинител и другите, тврдејќи дека го изнудувале. Граѓанскиот суд во Скопје пресуди дека Камчев не е жртва и нема право на надомест на штета.
-После скандалот СЈО пропадна. Како резултат на тоа, многу случаи на корупција на високо ниво кои СЈО ги разгледуваше стагнираат и остануваат и нерешени, одложувајќи ја одговорноста за многу поединци кои се занимавале со корупција слична на Камчев, велат од таму.
Како резултат на денешната акција, целиот имот и интереси во имотот на Камчев што се во САД или во сопственост или контрола на лица од САД се блокирани и мора да се пријават на Канцеларијата за контрола на странски средства.
Дополнително, блокирани се и сите субјекти кои се во сопственост, директно или индиректно, поединечно или збирно, 50 проценти или повеќе од едно или повеќе блокирани лица.
Сите трансакции на лица од САД во (или кои транзитираат) во Соединетите Американски Држави кои вклучуваат каков било имот или интереси во сопственост на Камчев се забранети, освен ако не се овластени со општа или специфична лиценца издадена од OFAC или не се изземени.
Забраните вклучуваат давање каков било придонес или обезбедување на средства, стоки или услуги од, до или во корист на кое било блокирано лице, или примање каков било придонес или обезбедување на средства, стоки или услуги од кое било такво лице.
Дополнително, финансиските институции и други лица кои се вклучени во одредени трансакции или активности со Камчев може да се изложат на санкции или да бидат предмет на извршно дејствие, велат од таму.
ПОВРЗАНИ ВЕСТИ
Која е македонската компанија „Сајтрокс“, која САД ја стави на црната листа
Кој се освен Мерко е на црната листа на САД
Фото: МИА