Со оглед на доверливоста на информациите, од Агенцијата за национална безбедност (АНБ) не информираа за определени системски пропусти и со дел од законските решенија во врска со случајот Онишченко.
Добивме еден редослед на тоа што се случувало, од објавувањето од страна на медиумите се до денеска, изјави денеска претседателот на Комисијата за надзор над работата на Агенцијата за национална безбедност и на Агенцијата за разузнавање, Љупчо Пренџов по завршување на седницата.
Тој напомена дека првата седница на Комисијата за надзор над работата на АНБ и Агенцијата за разузнавање била поврзана со прашањето на Онишченко, а втората за информацијата која што како опозиција ја побарале од страна на АНБ, за тоа што Агенцијата презела во врска со дојавите за бомби во училиштата и јавните објекти.
-Во однос на случајот со Онишченко, денеска се појави директорот на АНБ, кој пред неколку дена се извини што претходно не можел да присуствува. Во нормална демократија, пратениците прашуваат, а директорите одговараат.
Како членка на НАТО, транспарентноста кон народните избраници мора да биде на ниво и тоа не прави да бидеме демократска држава. Таа седница беше затворена на степен на државна тајна, највисок степен на доверливост, изјави Пренџов.
Тој потенцираше дека од страна на директорот на Агенцијата на седницата биле презентирани определени активности што ги имала Агенцијата изминатиот период, односно од период кога новинарите ја открија аферата со Онишченко.
-Генерално, добивме определени информации. Како претседател на на Комисијата, загрижен сум за тоа што АНБ, а и претходно со други имиња континуирано ги полни насловите на медиумите со негативности и сметам дека конечно мора да ставиме крај на тоа. Конечно таму мора да има ред, професионализам и да биде вистински чувар на државата, рече Пренџов.
Тој додаде дека информациите што ги добиле денеска, набрзо ќе бидат доставени до Владата.
Новиот директор на АНБ, Зарко Милошевски денеска по завршување на седницата рече дека ги образложил фактите и документите пред Комисијата за овој случај, но дека не може да даде повеќе информации.
-Јас ја исполнив својата законска обврска да реферирам по однос на случајот Онишченко пред Комисијата. Детално ги образложив фактите и докуменитте кои беа презентирани пред Комисијата. Со оглед на тоа што се работеше за сензитивна материја од строго доверлив карактер, не можам да дадам повеќе информации, изјави Милошевски.
Претседателот на Комисијата за надворешна политика Антонио Милошоски денеска изјави дека системскиот пропуст при доделувањето на државјанството на Онишченко носи со себе и објективна одговорност, а таа, како што рече, може во најголем дел да се лоцира кај претходниот директор на АНБ.
– Фразата системски пропуст при доделување на државјанството на Онишченко носи со себе и објективна одговорност, а таа може во најголем дел да се лоцира кај претходниот директор на АНБ во самата поставеност на работите и пропустите, рече Милошоски по седницата.
Тој исто така испрати апел до надлежните да понудат друго решение за амбасадор на Париз, место за кое е предложен досегашниот директор на АНБ, Виктор Димовски.
-Ценам дека треба претседателот на Владата и на државата во консултација со министерот за надворешни работи сериозно да размислат за упатување на господинот Виктор Димовски за амбасадор во Париз. Може и Комисијата за надворешни работи да расправа за оваа тема. Како претседател на Комисијата, моето мислење е дека имаме подобри решенија од Виктор Димовски за амбасадор во Париз, додаде Милошоски.
Инаку, украинскиот државјанин Онишченко кој се наоѓа на „црната листа“ на САД, доби македонско државјанство. Владата по објавувањето на аферата, ја поништи одлуката за доделување на државјанство.
МИА