Поглаварот на Исламската верска заедница(ИВЗ), Сулејман Реџепи на својот Фејсбук профил објави реакција дека оваа религиозна организација е шокирана од однесувањето на одредени полициски сили.
Според него, полицијата влегувала во џамиите вршела притисок врз имамите во однос на празнувањето на Фитр Бајрам. Реџепи вели дека вакви случаи имало во целата земја, но најмногу во Скопје и околината.
Министерството за внатрешни работи, категорично ги отфрли како паушални и неточни изесените тврдења.
Од МВР истакнуваат дека полицијата ниту има надлежност ниту пак се обидувало да наметне влјание врз верски старешини во верски установи, туку своето работење го темели исклучиво врз пропишаните законски норми и Уставот.
Дополнително во соопштението на полицијата се вели дека јавноста веќе знае дека во рамки на низата законски надлежности и активности на министерството влегува и превентивното делување во различни области од значење за сите граѓани на државно и на локално ниво.
„Во актуелниот момент на вонредна состојба на ниво на целава земја предизвикана од пандемијата со корона вирусот (“ковид 19“), Министерството за внатрешни работи покрај постапување во делот на почитувањето на донесените владини мерки, уредби и препораки за заштита на здравјето и животот на сите граѓанина нашата држава,особено внимание посветува и на превентивното делување.
Свесни за потребата од заедничко делување заради надминување на опасностите од пандемијата и зачувување на здравјето на граѓаните, со посебно внимание работиме на интензивирање на соработката со верските заедници со цел засилено превентивно делување особено во пресрет на претстојните државни и верски празници.
И во оваа ситуација станува збор за редовна полициска активност со цел доследно спроведување на мерките и препораките на Владата на Република Северна Македонија“, велат од МВР.
Се потенцира дека полициските службеници секојдневно работат и во делот на превенција информирање и едукација, а во насока на заедничко надминување на опасностите од пандемијата и зачувување на здравјето на граѓаните.
„Таквото полициско делување пред се на локално ниво, во локалните заедници, било и ќе биде наша редовна и секојдневна обврска, а во рамки на концептот на полицијата како сервис на граѓаните, граден децении наназад со нашите партнери од ОБСЕ и ЕУ“, велат од МВР.
МВР уште еднаш потенцира дека ќе остане доследно во исполнувањето на сите свои законски обврски и задачи чија што единствена цел, преку бескомпромисно спроведување на законите, е заштитата, личната сигурност и безбедност на сите наши граѓани, токму онака како што меѓу другото, налага и Уставот на нашата земја.
ПОВРЗАНИ ВЕСТИ
Владата пред тешка одлука: Каква полза од празничен полициски час ако ИВЗ си тера по старо?
Сулејман Реџепи ја предупредил Владата: ИВЗ нема да го почитува полицискиот час