Во јавноста веќе циркулира Одлуката на Комисијата за заразни болести која на денешната седница заклучила дека е потребно проширување на мерките за заштита од коронавирусот. Таа препорача сите градинки, училишта и факултети да бидат затворени во следните две недели.
За ова да стапи на сила потребно е Владата да ја усвои препораката, за што се очекува министерот за здравство Венко Филипче да информира во 14 часот.
Комисијата препорачува забрана на сите масовни собири на отворено и на затворено, а сите спортски собири да бидат без публика. Се воведува задолжителна самоизолација на сите лица кои доаѓаат од високо и средноризични држави во период од 14 дена.
Исто така Комисијата препорачува забрана за извоз на медицинска опрема и медицински средства и материјали од економски оператори од земјава, освен со посебна дозвола од Министерството за здравство.
Возрасните и поризичните категории граѓани со хронични болести да го ограничат движењето и да го избегнуваат јавниот превоз.
Исто така, се забранува патување во земји кои се од висок и среден ризик, а листата на овие земји ќе биде поставена на веб-страницата на Министерството за здравство и ќе биде секојдневно ажурирана.
Комисијата исто така препорачува вработените во здравствените установи кои се ангажирани во изборниот прецес да бидат изземени од натамошно учество и да бидат заменети со други лица.
За тие кои нема да ги почитуваат и ќе ги прекршат препораките, Комисијата истакнува дека ќе бидат казнети по член 205 и 206 од Кривичниот законик.
Исто така се бара да се воведе т.н. хелт локатор картичка за сите летови и компании.
ПОВРЗАНИ ВЕСТИ
Каков имот пријавила директорката на Клиниката за кожни болести, Нина Цаца Биљановска
Има ли основа за кривична одговорност за заразената директорка Нина Цаца Биљановска?