Претседателот Стево Пендаровски денеска во „Вила Билјана“ во Охрид оствари средба со претседателот на Република Хрватска, Зоран Милановиќ.
Како што информираат од Кабинетот на Прендаровски, на средбата било констатирано дека севкупните билатерални односи меѓу Македонија и Хрватска се карактеризираат со отворен и пријателски дијалог на сите нивоа, без отворени прашања, со одлична соработка на регионален и мултилатерален план, со акцент на сојузништвото во НАТО.
Двајцата претседатели разговарале за актуелните состојби поврзани со аспирациите на земјите од Западен Балкан за членство во Европската Унија, како и за економските предизвици предизвикани од руската инвазија врз Украина.
Претседателот Пендаровски потенцирал дека Хрватска е еден од најголемите поддржувачи на нашата евроинтеграција и се заблагодарил за искрената и јасна хрватска поддршка, при што двајцата претседатели порачале дека деблокадата на Македонија е предуслов за стабилноста на регионот и на Европа.
На средбата, како што се посочува во соопштението, е разговарано и за положбата на македонската заедница во Хрватска и хрватската во Македонија, при што било нагласено дека правата на малцинствата во двете земји се на високо ниво и била изразена подготвеност за нивно дополнително унапредување.
Фото: Кабинет на претседателот