Владата вечерва порача дека е неодговорно и покрај понуденото решение за раст на платите во образованието и детската заштита и воспитание да се продолжи со штрајкот и да се руши веќе воспоставениот образовен процес во услови кога се соочуваме со економска и здравствена криза.
Откако Самостојниот синдикат на вработените во обарзование, науката и културата (СОНК) попладнево објави дека продолжува со штрајкот од Владата оценија дека одбиената понуда за 2.500 денари покачување на платата значи дека СОНК ги става личните интереси пред оние на децата.
Со продолжувањето на штрајкот и одбивањето на понудата на Владата, со која се отвора простор за трајно решавање и подобрување на стандардот на вработените во образованите, според владиниот кабинет, ризикот за продолжување на училишната година е особено извесен.
Владината прес-служба во соопштение пренесе дека Владата во преговорите со СОНК понудила зголемување за 10 проценти на платите кои ќе се обезбедат со ребалансот на Буџетот, што би значело дека наставниците и воспитувачите би добиле просечно зголемување за 2.500 денари на нивните месечни примања.
Воедно, појаснија, и методологијата со која Владата ќе обезбеди континуиран раст на платите, ќе обезбеди трајно решавање на социјалниот статус на вработените во образование.
Синдикатот треба да има верба во институциите, бидејќи и претходно низ партнерски дијалог беше постигнато зголемување на платите на наставниците и на вработените во градинките од 21 процент.
Со ова зголемување платата на наставник/чка во основно образование е порасната за над 3.200 денари плус минат труд и сега е најмалку 24.786 денари. На наставник/чка во средно образование зголемувањето е над 4.300 денари плус минат труд и просечно платата е 25.874 денари. На воспитувачите пак во градинките платата им е зголемена за околу 6.400 денари плус минат труд, додека на негователите за околу 5.000 денари, наведуваат од Владата.
Дополнително што сметаат дека е исклучително важно кога се зборува за подобрување на статусот на вработените во образованието, според воспоставената пракса од оваа Влада, наведуваат во периодот од 2018 година до 13 април годинава на неопределено време се вработени вкупно 2.375 лица, што е половина од вкупната бројка вработени во градинките која се движи околу 4.600. Меѓу нив има работни места кои се трансформирани од определено на неопределено, но и отворени се нови вработувања. Дополнително во истиот период се обезбедени 416 согласности за унапредување на кадарот.
-Владата смета дека е неодговорно и покрај понуденото решение за раст на платите во образованието и детската заштита и воспитание да се продолжи со штрајкот и да се руши веќе воспоставениот образовен процес во услови кога се соочуваме со економска и здравствена криза.
Најдобриот интерес на децата треба да ни е на прво место, бидејќи правото на образование на секое дете е уставно загрантирано право. Учениците треба да се вратат во училиштата, таму каде што припаѓаат. Со продолжувањето на штрајкот и одбивањето на понудата на Владата со која се отвора простор за трајно решавање и подобрување на стандардот на вработените во образованите, ризикот за продолжување на училишната година е особено извесен.
Во овој контекст, несериозно е да се ставаат во ризик и да им се прави штета во личниот развој на децата кои треба да го продолжат образованието, да се запишат во средните училишта, да полагаат матура и да се запишат на факултетите во земјава и странство, стои во соопштението.
Од Владата истакнуваат дека согласно Законот за работни односи и Колективниот договор за основно и средно образование, и за вработените во јавните установи за згрижување и воспитание на деца од предучилишна возраст, на вработените кои штрајкуваат ќе им се исплатат само придонесите на платите.
Ова, прецизираат, произлегува од одлуката на СОНК да организира и одржува генерален штрајк за унапредување на правата на работниците, а во периодот од шест месеци од донесувањето односно зголемувањето на минималната плата. Законската обврска за усогласувањето е шест месеци од донесувањето, односно зголемувањето на минималната плата и Владата, а министерствата и СОНК сѐ уште преговараат во овој законски предвиден рок.
-Децата и учениците треба да ни се на прво место, затоа нарушувањето на образовниот процес е спротивно на правата загарантирани со Уставот и Законите. Местото на учениците е во училиштата и настава мора да има, истакнуваат од Владата.
ПОВРЗАНИ ВЕСТИ
СОНК го продолжува штрајкот, не ја прифати понудата за 10% повисоки плати