Поранешниот премиер и лидер на СДСМ, Зоран Заев, поранешниот премиер и лидер на ВМРО-ДПМНЕ, Никола Груевски и лидерот на ДУИ, Али Ахмети изминативе години имале десетици тајни средби за измените на Кривичниот законик, кои периодов ја брануваат јавноста, тврди во интервју за ТВ 21, Ахмети.
Средбите траеле со часови, имало формирано дури и работни групи, а за измените најпрво не се согласувале СДСМ и Заев, а на крај се повлекол актуелниот лидер на ВМРО-ДПМНЕ, Христијан Мицкоски.
-Имаше десетици средби во Клубот на пратеници за измена на овој Законик и истиот да се усогласи со европските стандарди. На тие средби имаше работни групи. Средбите се остварени на многу таен начин помеѓу Зоран Заев, Никола Груевски и мене. Сме разговарале со часови и со денови.
Дојдовме до моментот каде се согласивме сите и на крај се повлече ВМРО-ДПМНЕ, рече Ахмети, кој тврди дека измените на Кривичниот законик не биле амнестија или помилување како резултат на политички пазар, туку, како што вели, се правела корекција на еден неправеден закон што е реликт од поранешна Југославија, со цел рационалност и забрзување на постапките.
–На крај испадна интересен епилог. Првично, не се согласуваше Зоран Заев. Потоа кога се договоривме со СДСМ се повлече ВМРО. Се повлече Христијан Мицкоски од измената на Кривичниот законик и ова беше големо изненадување, кажа Ахмети.
ПОВРЗАНИ ВЕСТИ
Пендаровски откри кој од него барал амнестија за Груевски
Груевски демантира дека се „пазарел“ за измените на Кривичниот законик
Фото: Влада