Микробиологот и професор Никола Пановски на неговиот фејсбук-профил објави апел здравствените власти да објават протокол за лекување на Ковид-19, за да не дојде до непoтребно труење со лекови.
„По непроспиена ноќ и консултација со пет колеги, кои ги почитувам, а се активни во борбата против Ковид-19, и нивниот одговор 4:1, дека треба да објавам приказ на случај на пациент, не го знам, воден од интернист и него не го знам (резултатите се со избришани имиња и ЕМБГ, ги имаат петте колеги и министерот Филипче, не би ги објавувал оригинално), сепак:
Пациентот е со ЦРП 1,5, леукоцити 3,5, и се друго е во нормала освен покачени д димери 850. РТГ – понагласена.
Терапија: Панцеф, 10 дена, Сумамед 6 дена, Моксирал 10 дена, тоа од антибиотици, друго: ампули Nevaxon, Aminophyllinum, Novalgetol, Urbason, Famotidin, Clexan, се тоа да се прима два пати на ден, инфузија NaCl, и уште 3 суплементи во таблети.
Пациентот ги купил сите лекови за 7.000 ден, за среќа налетал на мои совесни колеги кои го пратиле на друг интернист и избегнато е „труење со медикаменти“.
Се работи за регион во Македонија каде смртноста од Ковид-19 е три пати повиска од просекот кај нас, а ова била стандардна терапија.
Како стручен за антибиотици нагласувам: сумамед се пие 3 дена, никогаш не се комбинира со моксирал, спектарот им се преклопува, а инаку во случајов нема индикации за антибиотик, нема пневмонија. За другите лекови нема да коментирам, само не ги разбирам зошто се дадени, освен клексанот.
Primum non nocere – пред се, не прави штета.
Порака до МЗ, ЛКМ, МЛД, Ве молам под итно преведете протоколи за Ковид 19 и објавете ги!!!
Хрватските се ок. Ова лудило мора да престане. Едуцираните и совесени матични лекари и оние од секундарното ниво на здравствена заштита се под невиден притисок од пациентите да се приклучат кон ова лудило и епидемија од полипрагмазија.
Штетата е огромна во секој поглед, па и во смисла на смртноста. Волку лекови одеднаш ни здрав атлета не би издржал,“ апелира Пановски.
Фото: Телма