Министерката за одбрана се појави со елегантен фустан на заедничката фотографија „family photo“ на министрите за одбрана на земјите – членки на НАТО, на состанокот на Северноатлантскиот совет.
На состанокот кој почна вчера, министрите разговараа за глобалните безбедносни предизвици, како и за развојот на НАТО – мисиите и операциите на глобално ниво.
Шекеринска порача дека „на средбата покажуваме дека веќе не сме тема на масата, туку дека сме членка на масата и дека нашата одлука и нашиот став се цени, се почитува и влијае на одлуките кои што ги носи Алијансата.“
Во седиштето на НАТО во Брисел, Шекеринска имаше одвоена средба со својата француска колешка, Флоренс Парли како и со министерот за одбрана на Обединетото Кралство, Бен Волис.
Шекеринска и Волис потпишаа нов Договор за соработка во одбраната помеѓу Македонија и Обединетото Кралство, документ кој ќе го замени постојниот Договор за билатерална соработка од 2007 година и се согласија дека овој договор ќе овозможи уште поблиска и посеопфатна соработка помеѓу две пријателски и сојузнички земји и армии.
Состаноците на Северноатлантскиот совет продолжуваат денеска со сесија посветена на растот на буџетите за одбраната на земјите – членки на Алијансата.
Фото: МО