Сопственикот на компанијата „Зсф-ком“ ДООЕЛ увоз-извоз Скопје, Фатмир Етеми кој треба да ја гради зградата кај Мајчин дом, а за која има голема спротивставеност од страна на граѓаните, синоќа одржал средба на која присуствувале граѓани и граѓански активисти од Аеродром, информираат од компанијата.
Тој информирал дека изминатиот период се правеле анализи и се барале можности за откажување од градбата.
„Баравме соодветно правно и економски оправдано решение. Прво се направи темелна анализа на достапните парцели за да се замени локацијата. Заклучено е дека во моментов нема соодветна парцела во Аеродром што ни одблиску може да ја компензира вредноста на плацот кај Мајчин Дом. Разгледани се сите опции на цела територија, секако надвор од урбаното јадро.
Имаше обиди да се најде локација и надвор од општината на територија на Градот Скопје, за што има сериозни правни пречки, но реално нема ни соодветна локација. Процедурата за носење нов ДУП или ГУП би траела околу три години, што е голема загуба земјаќи ги предвид сите тековни трошоци како месечната рата за кредит инвеститорот го има подигнато за оваа намена“, вели Етеми.
Инвеститорот дополнува дека ова земјиште е голема инвестиција, плацот е купен со веќе зацртана маркица за градба, согласно сите законски и правни процедури.
„Ова беше овозможено од претходното раководство на општината. Во случај да се откаже од градбата кај Мајчин дом, Општината би требало да му исплати на Етеми повеќе од повеќе од 8 милиони евра за досегашните инвестиции и трошоци.Тука се вклучени 5,5 милиони евра трошоци за земјиште и комуналии, трошоци за камати, штети на компанијата за инвестиции, досегашни трошоци за одржување и 184.000 евра секој месец, рата за кредитот подигнат за изградба на овој објект“, велат од компанијата.
Граѓаните потенцирале дека најголем страв им е нарушувањето на квалитетот на живот во регионот и потенцијалната штета врз животната средина. Тие исто така побарале одговорност од претходното општинско раководство, кое го изгласало ДУП И10, кој ја овозможува изградбата на овој објект.
ПОВРЗАНИ ВЕСТИ
(Фото) Како ќе изгледа зградата што треба да се гради кај Мајчин дом
(Видео) Граѓаните се обидоа да ја тргнат оградата кај Мајчин дом во Аеродром
Почна изградбата на висококатницата кај Мајчин дом: Аеродромци бараат оставка од градоначалникот